АНКАРА (АА) – Најмалку 12.873 луѓе загинаа, а 62.937 се повредени по двата разорни земјотреси кои во понеделникот ги потресоа јужните делови на Туркије, соопшти турската Агенција за управување со катастрофи и вонредни состојби (AFAD), јавува Анадолу.
Земјотреси со интензитет од 7,7 и 7,6 степени со епицентри во турската област Кахраманмараш, сериозно потресоа 10 области во Туркије, од кои се погодени 13 милиони луѓе.
„Во погодените региони распоредени се повеќе од 113.000 спасувачи, медицински и друг персонал и поставени се над 50.000 шатори“, се наведува во соопштението на АФАД.
Освен спасувачките тимови, во погодените подрачја се испратени и ќебиња, шатори, храна и тимови за психолошка поддршка.
Според податоците на АФАД, вкупно 50.818 шатори се поставени за преживеаните. На терен се испратени и 5.434 возила, меѓу кои има багери, трактори и булдожери.
За што побрзо изведување на операциите за претрага и спасување, Туркије во вторникот прогласи тромесечна вонредна состојба во 10 турски области, Адан, Адијаман, Дијарбакир, Газиантеп, Хатај, Кахраманмараш, Килис, Малатја, Османије и Шанлиурфа.
– Разорните земјотреси кои ја потресоа Туркије на 6 февруари –
Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
И турските области Газиантеп, Шанлиурфа, Дијарбакир, Адана, Адијаман, Малатја, Османие, Хатај и Килис се тешко погодени од земјотресите. Во текот на денот имаше и голем број последователни потреси со помал интензитет.
Туркије прогласи седумдневна жалост поради разорните земјотреси што ја потресоа земјата.
Земјотресите се почувствуваа и во соседна Сирија, но и во Ирак, Либан, Египет и во други региони.
Во земјотресите кои силно ги потресоа и северните делови на Сирија, животот го загубија најмалку 2.530 лица, а 4.645 се повредени.
Извор: www.aa.com.tr
