МАКЕДОНСКИ ВИЗУЕЛНИ УМЕТНИЦИ: Кристина Пулејкова
(Разговорот го води Ана Франговска, кураторка и историчарка на уметност)
онлајн настан | среда, 6.12.2023 | почеток: 20.00 часот
Со цел да се оствари континуитет во претставувањето на македонската визуелна сцена, КСП Центар-Јадро продолжува со нова серија разговори во живо, со македонски визуелни уметници и нивните дела изложувани на значајни изложби. Намерата е да се постигне поголема промоција како и генерациско поврзување што ќе помогне во воспоставувањето на континуитет и интензивирање на дијалогот на локалната уметничка сцена.
Кристина Пулејкова (р. 1988) е македонска уметница која живее и работи во Скопје и во Лондон. Нејзиното интердисциплинарно творештво се заснова врз науката и технологијата. Делото на Кристина го истражува начинот на кој употребата на технологијата може да доведе до поголеми облици на одржливост во односите човек – природа. Работејќи низ подвижни слики, звук и инсталација, таа има за цел да изгради субјективни наративи, засновани врз научни податоци и начела. Во своите дела има тенденција да претставува гласови – гласови од суштества, предмети, па дури и атоми, со цел да се обиде да ги воведе нечовечките перспективи. Преку употребата на напредната технологија, делата на Кристина честопати се занимаваат со прашања од животната средина, притоа раскажувајќи лични приказни, кои ја ставаат публиката во центарот на сцената, овозможувајќи протагонистички пристап и поинаков начин на гледање на нештата.
Пулејкова има диплома за магистериум (БА + м-р) по сликарство и анимација од Универзитетот за применети уметности, Виена, Австрија (2012) и магистер по уметност и наука од Централ Сент Мартинс, Лондон, Велика Британија (2014). Таа е добитник на инаугуративната стипендија FLAMIN од Филм Лондон (2017). Делата на Кристина се изложени/прикажани во Националната галерија, Скопје; МСУ, Скопје; Научниот музеј, Лондон, Велика Британија; Музеј MAN, Сардинија, Италија; V&A, Лондон, Велика Британија; МАК, Виена, Австрија; Project Space Kunsthalle, Виена, Австрија; Хет Гласпавиљон, Ајндховен, Холандија; Горна галерија, Амстердам, Холандија; Арт COP21 Париз, Франција; Галерија Вајтчепел, Лондон, Велика Британија; Art Licks Festival, Лондон, Велика Британија; Lewisham Art House, Лондон, Велика Британија; Кралскиот колеџ за уметности, Лондон, Велика Британија и многу други.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
