Самиот факт што сите актери во изборите ги признаа резултатите тоа значи дека сме веќе еманципирани да се спроведат избори како што треба и сигурно ќе добиеме добра оценка од ОБСР/ОДИХР, па во целина треба да бидеме задоволни, вели аналитичарот Исмет Рамадани во СТУДИО 10 на ТВ 24.
– Јавен повик од Европскиот фронт кон членството и симпатизерите да се бојкотираат претседателските избори немаше, оти тоа не се прифаќа во земјите членки на ЕУ. Но, факт е дека имало случаи да не се зема ливчето за претседателски избори за што набљудувачите веќе имаат поднесено извештај. Мислам дека треба да им се даде и тоа право на граѓаните, доколку не сакаат да гласаат за понудените личности, вели Рамадани и додава дека сепак граѓаните постапија зрело на овие избори.
Рамадани вели дека кога би имало организиран бојкот ќе имавме ситуации кои ќе беа дискутабилни, но тоа не се случи.
– Она што малку ме загрижува е што овој пат е поразена либерал демократијата односно социјал демократијата што е и европски тренд. Ако е поразена социјал демократијата како идеолошка димензија тогаш вината е кај луѓето кои се декларираат како припадници на таа опција. Се надевам дека победниците и тие кои ќе ја состават владата повеќе ќе се грижат како ќе ја водат државата отколку со привилегиите што ќе ги добијат. Имавме гарнитура која уживаше во привилегиите што ги дава власта, но тоа ѝ стана приоритет пред потребите на граѓаните. Новата влада треба да се насочи кон ЕУ, а и вокабуларот се смени уште од синоќа што значи дека се свесни за одговорностите што стоојат пред нив, вели Рамадани.
Тој додава дека партија која има 59 пратеници нема да има проблем да состави влада, но во однос на албанскиот блок работите ќе бидат потензични оти имаме победа на ДУИ, но и одличен резултат на Влен со разлика од само 6 пратеници споредено со ДУИ.
– Се надевам дека ќе се најде начин да се реши ова, наместо да се предизвикува политичка криза. Знам дека е сигурен партнер е Влен. Но низ кампањата имаше работи кои се споменуваа и прашање е како ВМРО-ДПМНЕ тоа ќе го амортизира, вели Рамадани.
Извор: 24vesti.mk
