Путин: Русија го суспендира учеството во Договорот за намалување на стратегиското оружје

Тој додаде дека Русија ќе изврши нови тестови за нуклеарно оружје доколку Америка го стори тоа

Русија го суспендира учеството во Договорот за намалување на стратегиското оружје (СТАРТ), изјави рускиот претседател Владимир Путин во своето обраќање во руската Дума.

Откако ги обвини НАТО и САД за недостиг на соработка, тој рече:

„Затоа сум принуден да објавам дека Русија го суспендира своето учество во Договорот за намалување на стратегиското оружје“.

Тој додаде дека Русија ќе изврши нови тестови за нуклеарно оружје доколку Америка го стори тоа.

„На почетокот на оваа година добивме барање за инспекции на нашиот нуклеарен арсенал. Ова е апсурдно. Знаеме дека НАТО е директно вклучен во нападите врз руските објекти и сили. Тие нè напаѓаат, а сакаат да воведат инспекции? Ова е апсурдно. НАТО и САД отворено кажуваат дека целта им е стратегиски пораз на Русија. Потоа очекуваат да ги пуштиме во нашите капацитети? Нуклеарниот арсенал не е само во САД, туку и во Франција и Британија. Сето ова оружје е насочено против Русија. Изјавите на нивните лидери тие го потврдуваат тоа. Тоа мора да го земеме предвид“,

рече Путин.

Првиот договор за контрола на нуклеарното оружје беше потпишан со САД во 1991 година. Потоа, нашите односи достигнаа такво ниво што САД и Русија рекоа дека повеќе не се сметаат за непријатели. САД го напуштија тој договор. Нашите односи пропаднаа, изјави Путин.

„Почнаа да ги уништуваат сите основи на светскиот поредок по Втората светска војна и чекор по чекор го уништуваат системот на светска безбедност и контрола на оружјето. Тие започнаа серија војни низ светот со иста цел – да ги уништат меѓународните односите по Втората светска војна. Од 1945 година ситуацијата се промени, тоа е објективен процес што не може да се игнорира. Она што е неприфатливо е што САД почнаа да го реструктуираат светскиот поредок во согласност со своите потреби“,

изјави Путин, додавајќи дека членките на НАТО сега велат дека Русија мора да ги послуша нивните барања.

„Нивните барања се или цинични или глупави. Тие не се глупави, тие сакаат да ѝ нанесат стратегиски пораз на Русија. Ви велам, не го напуштаме договорот засекогаш, го паузираме. Мораме да одредиме што сакаат Франција и Британија “,

рече Путин.