Генералот Сергеј Суровкин, кого руските медиуми го нарекоа „генерал Армагедон“, поради неговата наводна немилосрдност, беше назначен од Кремљ за врховен командант на руските сили во Украина пред само три месеци, по серијата контраофанзиви на украинската војска кои донесоа промени на фронтот во корист на Киев
Руското министерство за одбрана денеска соопшти дека началникот на генералштабот на руските сили, генерал Валериј Герасимов е назначен за нов командант на здружените сили во „специјалната воена операција во Украина“ – како што Москва ја нарекува инвазијата на оваа земја.
Генералот Сергеј Суровкин, кого руските медиуми го нарекоа „генерал Армагедон“, поради неговата наводна немилосрдност, беше назначен од Кремљ за врховен командант на руските сили во Украина пред само три месеци, по серијата контраофанзиви на украинската војска кои донесоа промени на фронтот во корист на Киев.
Суровикин, како што наведуваат од руското министерство за одбрана, сепак ќе остане заменик на Герасимов.
Министерството соопшти дека промените се дизајнирани да ја зголемат ефикасноста на управувањето со воените операции во Украина, повеќе од 10 месеци по руската инвазија на земјата.
Герасимов, како и министерот за одбрана Сергеј Шојгу, се соочи со остри критики од провоените воени блогери за повеќекратните неуспеси на бојното поле на Русија и неуспехот да обезбеди победа во војната што Кремљ очекуваше дека ќе биде краткотрајна.
Руските и украинските сили се вклучени во интензивни борби околу градот Соледар во источна Украина, што, според Ројтерс, може да биде пресвртница во обидот на Москва да го заземе целиот регион Донбас.
Извор: 360stepeni.mk
