Пукано кон објектот на телевизијата Топ чанел во Тирана, убиено лице од обезбедувањето

Како што пренесува телевизијата, повикувајќи се на информации од албанските истражни органи, возило марка „рејнџ ровер“, за кое се верува дека има припаѓало на напаѓачите, е пронајдено запалено на автопатот во близина на Каваја

Непознати напаѓачи ноќеска пукале со огнено оружје кон објектот на Топ чанел, најгледаната албанска телевизија. Во инцидентот, кој се случил околу 1 часот по полноќ, убиен е 60-годишниот Пали Кока, ангажиран како обезбедување.

Полицијата и обвинителството го истражуваат случајот. Засега нема детали за околностите и мотивите за вооружениот напад.

Полициски екипи пред објектот на ТВ Топ чанел/Фото: Топ чанел

Како што пренесува телевизијата, повикувајќи се на информации од албанските истражни органи, возило марка „рејнџ ровер“, за кое се верува дека има припаѓало на напаѓачите, е пронајдено запалено на автопатот во близина на Каваја.

Запаленото возило „рејнџ ровер“ за кое се верува дека им припаѓало на напаѓачите/Фото: Топ чанел

Полициски екипи веднаш по пријавата излегле на местото на настанот, а увидните екипи продолжуваат со работата за прибирање докази за расчистување на случајот и пронаоѓање на напаѓачите.

По инцидентот, веднаш реагираше албанскиот претседател Блерим Бегај, кој рече дека станува збор за сериозен инцидент. Тој побара од надлежните брзо да го расветлат случајот, истовремено изразувајќи сочувство до семејството на убиениот.