Поранешниот грчки министер за финансии Јанис Варуфакис во петокот вечерта бил нападнат и претепан од група маскирани лица пред ресторан во анархистичкиот кварт во Атина, по што бил пренесен во болница, каде било утврдено дека му бил скршен носот, објавија во саботата грчките медиуми.
Шеесет и едногодишниот претставник на левичарската опозиција најпрвин бил навредуван од група од дваесетина луѓе пред ресторанот, каде што вечерал со приврзаниците на неговата партија Мера25. Варуфакис потоа отишол до влезот на ресторанот за да разговара со нив, но потоа неколку маскирани лица го нападнале, го фрлиле на земја и почнале да го удираат со клоци по телото и лицето, пренесуваат грчките медиуми.
По нападот, Варуфакис бил пренесен во болница, каде што било констатирано дека му е скршен носот.
Варуфакис на Твитер изрази благодарност за солидарноста што ја добил по нападот.
Тој ги негирал информациите дека напаѓачите биле автономисти, анархисти или левичари.
Според него, станува збор за однапред ангажирани насилници кои го обвиниле дека среде должничката криза во 2015 година, кога бил министер за финансии, ја продавал Грција на странски земји.
By they bye: They were not anarchists, leftists, communists or members of any movement. Thugs for hire they were (and looked it) who clumsily invoked the lie that I sold out to the troika. We shall not let them divide us. Onwards! 2/2
— Yanis Varoufakis (@yanisvaroufakis) March 11, 2023
„Тие беа платеници (и така изгледаше) кои невешто ја повторуваа лагата дека сум се продал. Не дозволуваме да не поделат. Напред!“, напишал Варуфакис.
Неговата партија го нарече нападот „дрзок фашистички напад од провокативни насилници“.
Варуфакис веќе бил жртва на сличен напад пред истиот ресторан во 2015 година.
ИЗВОР: kurir.mk
