ИСЛАМАБАД (АА) – Клучниот граничен премин меѓу Пакистан и Авганистан, кој остана затворен три дена по престрелките, e oтворен повторно, изјави официјален претставник денес, јавува Анадолу.
Границата Торкам, која ја поврзува северозападната пакистанска покраина Хајбер Пахтунхва со источната авганистанска провинција Нангархар, се отвори денес по престрелките меѓу граничните безбедносни сили на двете земји.
„Границата повторно е отворена утрово за патници и транспорт, откако остана затворена три дена“, изјави за Анадолу, Абдула Кан, локален пакистански службеник на границата.
Затворањето на границата Торкам, еден од двата главни премини меѓу Пакистан и Авганистан, предизвика големи загуби на веќе намалената трговија меѓу двата соседа, бидејќи Торкам е еден од најпрометните трговски патишта меѓу Исламабад и Кабул.
Обемот на трговска размена меѓу Авганистан без излез на море и неговиот јужен сосед беше најмногу погоден од терористичките напади во Пакистан за кои Исламабад ги обвинува милитантите со седиште во Авганистан, што доведе до затворање на граничните премини.
Во вторникот, Забихула Муџахид, главен портпарол на привремената авганистанска Влада, рече дека ги истражуваат извештаите за пакистански борбени авиони кои го нарушиле авганистанскиот воздушен простор додека патролирале.
Неговата изјава дојде по судирот меѓу безбедносните сили на двата соседи во близина на границата Торкам и непотврдените извештаи за пакистански борбени авиони кои патролираат во воздушниот простор на Нангархар и соседната провинција Кунар.
Исламабад ги обвинува милитантите на Техрик-е-Талибан Пакистан, со седиште во Авганистан, дека извршуваат милитантни напади во Пакистан, додека Кабул ги негира наводите дека таквите напади се изведуваат од негова територија.
Спорадичните судири меѓу војниците на пакистанско-авганистанската граница траат долго време, без прекини дури и откако талибанците ја презедоа власта во земјата разурната од војна во август 2021 година.
Пакистан и Авганистан имаат 18 гранични премини, од кои најпрометни се Торкам и југозападниот Чаман во провинцијата Белуџистан.
Авганистан не ја признава линијата Дуранд – де факто границата меѓу двете земји – со образложение дека е создадена од британски колонијал „за да ги подели етничките Паштуни“.
Исламабад останува на ставот дека линијата Дуранд е постојана граница меѓу двете соседни земји.
Границата долга 2.640 километри е воспоставена во 1893 година во согласност со договорот меѓу Индија под британска колонијална власт и Абдур Рахман Кан, тогашниот владетел на Авганистан.
Извор: Anadolu Agency (AA)
