Повеќе од 40.000 луѓе го напуштија главниот град на Хаити, Порт о Пренс во изминатите 10 дена поради ново избивање на насилство од вооружени банди, соопшти Меѓународната организација за миграција (ИОМ).
Канцеларијата на ОН ја опиша ситуацијата со раселувањето на луѓето поради насилство како најлоша во изминатите две години.
Вкупно 40.965 луѓе го напуштија главниот град меѓу 11 и 20 ноември како резултат на насилството, објави ИОМ.
„Степенот на ова раселување е без преседан од почетокот на нашиот одговор на хуманитарната криза на Хаити во 2022 година“, коментираше Грегоар Гудштајн, шеф на ИОМ на Хаити, во соопштени.
Над 700.000 луѓе се раселени вкупно во оваа сиромашна карипска земја. „Оваа криза не е само хуманитарен предизвик, таа е тест за нашата колективна одговорност“, рече Гудштајн, нагласувајќи ги тешкотиите со кои се соочуваат тимовите на ОН.
Хаити со децении страда од политичка нестабилност и безбедносна криза поради вооружените банди обвинети за убиства, киднапирања и сексуално насилство. Во изминатите две недели, Порт-о-Пренс и соседните општини се соочија со нов наплив на насилство, поттикнат од сојузот на банди формиран во февруари, што успеа да го собори тогашниот премиер Ариел Анри.
Извор: 24vesti.mk
