Поранешниот украински претседател Петро Порошенко изјави дека иако украинските партнери стравуваат дека војната против неговата земја може да прерасне во трета светска војна, тие треба да се разбудат бидејќи, како што наведе, третата светска војна веќе почна, порача Порошенко во интервју за „Тајмс оф Малта“.
– Имаме севернокорејски војници на територијата на Украина. Имаме беспилотни летала од Иран, кои удираат непосредно пред мојата куќа. Имаме севернокорејски ракети, кои ја напаѓаат енергетската инфраструктура во Киев и артилериски гранати доставени до Русија од Северна Кореја и Иран“. Петро Порошенко поранешен претседател на Украина.
Во исто време руската армија регрутирала стотици јеменски платеници за учество во војната против Украина, објави „Фајненшл тајмс“.
Јеменците за весникот изјавиле дека им било ветено добро платено работно место па и руско државјанство. Но, откако пристигнале во Русија преку компанија поврзана со хуситското движење, тие биле принудно вклучени во составот на руските вооружени сили и испратени на првата линија на фронтот.
Сенаторот од Јужна Дакота, Мајк Раундс, кој е од редовите на Републиканската партија, ги отфрли повиците за мировен договор меѓу Русија и Украина, тврдејќи дека на рускиот претседател Владимир Путин не може да му се верува. Се залажуваме ако мислиме дека може да преговараме со тиранин. Верувате ли дека ќе запре ако му понудите дел од слободна земја? – рече Раундс на безбедносниот форум во Халифакс. Неговите ставови се во спротивност со новоизбраниот претседател, Доналд Трамп, кој тврди дека би можел да го реши конфликтот за еден ден.
Извор: 24vesti.mk
