Лионел Меси од вечера е на собирот на репрезентацијата на Аргентина и концентриран е на првиот натпревар на „гаучосите“ по светската титула. Сепак, вечерва медиумите во Шпанија објавија сензационална вест за неговата индина.
Во летото 2021 година Лионел Меси ја напушти Барселона како слободен играч и потпиша за ПСЖ, а следното лето може да се случи обратна ситуација. Договорот на Аргентинецот со парижани истекува на крајот од сезоната. Преговорите траат подолго време и се чини дека самиот Меси ја одолговлекува одлуката и потписот, што е добро за клубовите кои го посакуваат. Таму најмногу се издвојуваат Ал Хилал и Интер Мајами, но желбата на Меси е да остане во Европа и, ако им се верува на шпанските медиуми, да се врати во Барселона. Според новинарот Херардо Ромеро, првичниот план на Меси бил да остане во ПСЖ, но неодамна фудбалерот се предомислил. Промената може да биде поврзана и со фактот што ПСЖ беше елиминиран од осминафиналето на Лигата на шампионите, и со гестот што минатата недела го направија навивачите на тимот, кои го исвиркаа Аргентинецот на „Паркот на принцовите“ пред натпреваот со Рен.
Дополнително, Меси смета дека враќањето во Барселона би било од корист и за неговото семејство, кое не се приспособи на животот во француската престолнина и по речиси две години сака да се врати во Каталонија. Дури и да е јасна желбата на играчот, невозможно е Барселона, барем во моментов, да му понуди договор на Меси. Каталонците ја надминаа границата на платите во Примера, поради што неодамна беше поништен новиот договор на Гави.
Бидејќи Барселона во моментов не може да регистрира нови играчи, клубот од „Камн Ноу“ би морал да се откаже од повеќе играчи, за подоцна да нема проблеми со евентуалната регистрација на Меси. Останува да видиме дали Барселона ќе најде решение. Едно е јасно – домот на Меси е во Барселона и сигурно милиони луѓе би биле среќни со неговото враќање.
ИЗВОР: kurir.mk
