Почина фудбалскиот тренер и поранешен селектор на хрватската репрезентација Мирослав Чиро Блажевиќ

Најголемиот успех во кариерата го постигна со „Динамо Загреб“ во 1982 година, кога стана шампион на Југославија, како и со селекцијата на Хрватска, со која освои бронза на Светското првенство во Франција во 1998 година

Легендарниот фудбалски тренер и поранешен селекрот на хрватската фудбалска репрезентација Мирослав Чиро Блажевиќ почина во средата, на 8 февруари, во Загреб на 88-годишна возраст, по долго и тешко боледување.

Блажевиќ е роден на 10 февруари 1935 година во Травник, Босна и Херцеговина, а фудбалската кариера ја почнува во локалниот клуб „Братство“. Потоа настапува за загрепските клубови „Динамо“ и „Локомотива“, од каде што се сели во Сараево каде што игра до 1958 година.

Следните три години настапува за тимот на Риека, а потоа е член на швајцарскиот Сион.

Тренерската кариера ја започнал во швајцарскиот нисколигаш „Веве“. Водел вкупно 19 клубови во Швајцарија, Хрватска, Грција, Словенија, Босна и Херцеговина, Кина и Иран и бил тренер на пет репрезентации (Швајцарија, Хрватска, Иран, Босна и Херцеговина и кинеската репрезентација до 23 години).

Најголемиот успех во кариерата го постигна со „Динамо Загреб“ во 1982 година, кога стана шампион на Југославија, како и со селекцијата на Хрватска, со која освои бронза на Светското првенство во Франција во 1998 година. Блажевиќ е единствениот тренер кој со клубот „Динамо“ освоил шампионски титули во СФРЈ и Хрватска, а воедно и единствениот што го освоил фудбалскиот куп во СФРЈ и Хрватска.

Го водеше „Динамо“ во четири различни мандати и освои три титули во лигата, два купа и еден Суперкуп.

Хрватската фудбалска репрезентација ја водеше 72 пати (33 победи, 24 нерешени и 15 порази).

Тој е единствениот во историјата кој трипати ја добил државната спортска награда „Фрањо Бучар“, а последниот јавен настап го има во декември минатата година, кога во Загреб ја доби наградата „Владимир Беара“ за придонес во развојот на спортска култура и социјална толеранција.

Блажевиќ во 2005 година се кандидираше на претседателските избори во Хрватска и освои 0,80 отсто од гласовите.