Ваквиот потег следува по соборувањето на кинескиот балон за надзор што прелета над САД минатата недела, притоа зголемувајќи ги политичките тензии меѓу двете најголеми економии во светот. САД велат дека балонот бил опремен да детектира и да собира разузнавачки сигнали, а од друга страна Пекинг тврди дека се работи за цивилен балон за метеоролошки истражувања кој случајно навлегол во воздушниот простор на САД
Администрацијата на американскиот претседател Џо Бајден во петокот стави на „црната листа“ шест кинески компании кои се поврзани со воздушните програми за набљудување на кинеската армија.
Ваквиот потег следува по соборувањето на кинескиот балон за надзор што прелета над САД минатата недела, притоа зголемувајќи ги политичките тензии меѓу двете најголеми економии во светот.
Според одлуката на американскиот оддел за трговија, на шесте компании ќе им биде ограничено да добиваат артикли и технологии од САД без одобрение од американската влада.
„Шесте компании ги поддржуваат напорите за модернизација на кинеската влада, особено оние поврзани со воздушните програми, вклучувајќи воздушни бродови и балони и сродни материјали и компоненти, кои се користат од Народноослободителната армија за разузнавање и извидување“,
се вели во соопштението на американското Министерство за трговија.
Во соопштението се додава дека со овој потег американското Министерство за трговија испраќа јасен сигнал до компаниите, владите и другите засегнати страни на глобално ниво дека субјектите ставени на црната листа претставуваат закана за националната безбедност на САД.
Овој потег може дополнително ќе го интензивира дипломатскиот спор меѓу Кина и САД предизвикан кога минатиот викенд беше соборен балон во близина на брегот на американската држава Северна Каролина.
САД велат дека балонот бил опремен да детектира и да собира разузнавачки сигнали. Од друга страна, Пекинг тврди дека се работи за цивилен балон за метеоролошки истражувања кој случајно навлегол во воздушниот простор на САД.
Извор: 360stepeni.mk
