По вчерашното масовно убиство во основно училиште во Белград, српскиот претседател Александар Вучиќ објави предлог-мерки со кои, меѓу другото, се предвидува и ревизија на сите издадени дозволи за оружје и контрола на начинот на кој лицата со дозволи го чуваат оружјето. Тој предложи и воведување мораториум за издавање, чување и носење за секое оружје во следните две години, освен за ловечко оружје
По вчерашната трагедија во Белград, во која 13-годишен ученик со пиштолот на својот татко уби осум ученици и чувар во основно училиште, српското Министерство за внатрешни работи (МВР) најави дека ќе почне со опсежни проверки на сите сопственици на оружје.
Проверките, како што е најавено, ќе се прават за да се утврди дали сопствениците го чуваат оружјето согласно важечките прописи – одвоено од муниција и затворено во соодветни сефови.
„На сопствениците на оружје, чие оружје ќе се констатира дека е невнимателно чувано, за да може да дојде во сопственост на неовластени лица и да ја загрози безбедноста на луѓето, ќе им биде одземено оружјето и ќе биде поднесено барање за поведување прекршочна постапка согласно Законот за оружје и муниција“,
соопштија од МВР на Србија.
Министерството ги повика сите сопственици на оружје совесно да го чуваат оружјето и да го затвораат во сефови, за да биде недостапно за неовластени лица, особено за деца.
„Исто така, апелираме до сопствениците на оружје да проверат дали го чуваат оружјето одвоено од муницијата, како и да ги направат клучевите или шифрите од касите или сефовите, во кои го чуваат оружјето, недостапни за други лица, особено деца“,
додаваат оттаму.
Претседателот на Србија, Александар Вучиќ, вчера објави предлог-мерки со кои, меѓу другото, се предвидува и ревизија на сите издадени дозволи за оружје и контрола на начинот на кој лицата со дозволи го чуваат оружјето.
Вучиќ предложи и воведување мораториум за издавање, чување и носење за секое оружје во следните две години, освен за ловечко оружје, но изрекување кривична одговорност на лица кои овозможуваат малолетници да набават огнено оружје и обучуваат малолетници за ракување со оружје.
Тринаесетгодишниот ученик кој вчера изврши масовно убиство во основното училиште „Владислав Рибникар“ во белградската општина Врачар, пукал со пиштол калибар 9 милиметри, а со себе носел и малокалибарски пиштол и четири молотови коктели. Во нападот се убиени девет лица – осум ученици и чуварот на училиштето. Шест ученици и наставничка се тешко повредени и пренесени в болница.
ИЗВОР: 360stepeni.mk
