Нашата одлука да не ја поддржиме ГЕРБ во првиот мандат се заснова на вредности. Тоа што го видовме во минатиот парламент и на овие избори се заснова на овие вредносни разлики, рече лидерот на Продолжуваме со промените, Кирил Петков
Коалицијата на Продолжуваме со промените и Демократска Бугарија (ПП-ДБ), нема да поддржат влада со мандат или учество на ГЕРБ, информираа на прес-конференција партиските челници.
„Сите партии во коалицијата одлучија дека нема да поддржиме влада со мандат или учество на ГЕРБ. Јасно е дека не успеавме доволно да ги убедиме бугарските граѓани дека за европскиот пат на развој на земјата вреди да излезат да гласаат“,
изјави Асен Василев, копретседател на Продолжуваме со промените кој оцени дека имало сериозни проблеми со спроведувањето на изборите.
Нашата одлука да не ја поддржиме ГЕРБ во првиот мандат се заснова на вредности. Тоа што го видовме во минатиот парламент и на овие избори се заснова на овие вредносни разлики, рече од своја страна Кирил Петков.
Тој изјави дека во коалицијата се обединети околу одлуката ПП-ДБ да работи на важни политики со сите политички партии.
„Ќе разговараме со сите нив, бидејќи на бугарските граѓани им ветивме јасни политики за справување со актуелните проблеми. Почнувајќи од буџетот, кој не може да биде заложник на разговорите меѓу политичките партии“,
рече Петков.
Петков изјави дека треба што побрзо да се донесе буџет, бидејќи ниту народот ниту бизнисот не можат да чекаат.
За цените на храната изјавија дека ќе работат на нова стратегија во бугарското земјоделство за бугарската храна да доаѓа на бугарските трпези по ниски цени. За ова ќе разговараат со сите политички партии.
„Шенгенот е приоритет и тоа може да се случи доколку имаме јасни заеднички акции на оваа тема“,
категоричен беше Петков.
Според него, доколку ГЕРБ не успее да формира влада со првиот мандат, ПП-ДБ ќе предложи кабинет со вториот мандат.
Генералниот став на коалицијата го потврди Христо Иванов од Демократска Бугарија.
„Нашата оценка е дека обединувањето не успеа да го оствари својот целосен потенцијал на овие избори, но ветувањето што го дадовме треба да се исполни – да се врати парламентарната република и парламентарната влада во Бугарија. Големото прашање е да се има влада, но таа треба да биде таква што ќе може да ги реализира приоритетите на дело, а не на зборови. Ова ќе биде нашата цел и ќе продолжиме да го разгледуваме очигледното – без длабока, сериозна реформа во правдата, ниту една од овие цели нема да се постигне“,
заклучи Иванов.
Лидерите на Продолжуваме со промените Кирил Петков и Асен Василев уште пред неколку дена категорично изјавија дека нема да поддржат влада на ГЕРБ или со учество на партијата на Бојко Борисов.
Лидерот на ГЕРБ Бојко Борисов, пред два дена соопшти дека единствената задача пред новото Народно собрание е формирање редовна влада. Тој рече ќе биде пратеник во 49. Народно собрание и лично ќе ги води преговорите со другите партии.
„Нови избори значат ризик за парламентарната демократија. Ќе ги поканиме апсолутно сите партии што бугарскиот народ ги испрати во Народното собрание. Најстабилна влада – онаа што ќе го смири бизнисот е коалицијата меѓу големите партии“,
изјави Борисов.
Во Бугарија во неделата се одржаа парламентарни избори, петти по ред во период од две години. Според резултатите што ги објави Централната изборна комисија (ЦИК) на Бугарија, во новиот состав на бугарскиот парламент ќе влезат шест партии, односно коалиции. Прва со најмногу гласови е коалицијата ГЕРБ-СДС на поранешниот премиер Бојко Борисов. Таа има 49 769 гласа повеќе, или помалку од два отсто од второпласираната коалиција на Кирил Петков – Продолжуваме со промените-Демократска Бугарија (ПП-ДБ).
Извор: 360stepeni.mk
