Во следните денови шефот на државата ќе донесе одлука дали и кои укази ќе бидат потпишани
Претседателот на државата Стево Пендаровски со својот правен тим ќе ги разгледа измените на законите поврзани со коридорите 8 и 10-д донесени вчера од Собранието, посочуваат од Кабинетот на Претседателот. Дури потоа Пендаровски ќе излезе со став и ќе каже дали и кои укази ќе бидат потпишани.
„Вчера попладне во Кабинетот на претседателот се пристигнати законите. Во следните денови ќе бидат разгледани од претседателот и ќе биде донесена одлука дали и кои укази ќе бидат потпишани. Бидејќи се повеќе закони, ќе треба неколку дена претседателот да ги разгледа со својот правен тим“,
велат оттаму.
Собранието на вчерашното продолжение на 115-тата седница ги донесе измените и дополнувањата на петте закони поврзани со реализацијата на договорот со „Бехтел и Енка“ за изградба на четири автопатски делници на коридорите 8 и 10-д.
Законите што претходно ги разгледуваше Комисијата за европски прашања беа усвоени со по 62 гласа „за“ и по 43 „против“. Единствено за Законот за изменување и дополнување на Законот за урбанистичко планирање, по скратена постапка, против гласаа 44 пратеници.
Другите четири закони што ги донесе денеска Собранието со по 62 гласа „за“ се: Закон за изменување и дополнување на Законот за работните односи, по скратена постапка; Закон за изменување и дополнување на Законот за експропријација, по скратена постапка; Закон за изменување и дополнување на Законот за градење, по скратена постапка и Закон за изменување и дополнување на Законот за утврдување на јавен интерес и номинирање на стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10-д (делница на автопатот Прилеп– Битола) во Република Северна Македонија, по скратена постапка.
Владејачкиот СДСМ денеска преку писмено соопштение до медиумите се пофали со изгласаниот пакет закони поврзани со изградбата на коридорите.
Премиерот Димитар Ковачевски, пак, изјави дека претседателот на државата ќе го каже својот финален збор во однос на законските решенија неопходни за реализација на договорот со „Бехтел и Енка“, а неговото лично мислење е дека овие законски измени се потребни.
ПОВЕЌЕ НА ОВАА ТЕМА:
ИЗВОР: 360stepeni.mk
