Во земјите од Европската унија денеска завршува гласачкиот циклус за европските избори, кој започна пред три дена. Овие избори за европските претставници се одржуваат во различни денови.
Актуелната претседателка на Европската комисија, Урсула фон дер Лајен, која се кандидираше за втор мандат, денеска во Германија гласаше на изборите за Европскиот парламент. Таа претходно на платформата X повика земјите членки со гласањето да ја покажат силата на демократијата.
– Да ја покажеме силата на нашата демократија. Да ја направиме Европа, нашиот заеднички дом, посилна од кога било. – изјави Фон дер Лајен.
Фон дер Лајен е водечки кандидат на централно-десничарската Европска народна партија за претседател на Европската комисија, што значи дека гласачите на изборите за Европскиот парламент не можат директно да гласаат за неа, но индиректно ќе влијаат дали таа ќе биде избрана за уште еден мандат.
Инаку изборниот процес за нови пратеници за идниот петгодишен мандат на ЕП. Започна во четврток, на 6 јуни. Први гласаа граѓаните на Холандија. Денеска изборите се одржуваат во 21 земја членка на унијата. На целата територија на Европската Унија право на глас имаат околу 370 милиони граѓани. А Првите прелиминарни резултат се очекуваат доцна вечерва откако ќе заврши гласањето во сите 27 земји-членки.
Сите анкети покажуваат дека во новиот состав на Европскиот парламент ќе има значително поголем број пратеници кои доаѓаат од десничарските партии. Колку претставници ќе има секоја земја во Европскиот парламент се определува според големината на нејзиното население. Најмногу европски претставници ќе има Германија – 96, а најмалку Малта, Луксембург и Кипар – по шест. За да постои една политичка група во парламентот, таа мора да има најмалку 23 претставници кои доаѓаат од најмалку седум земји на ЕУ.
Извор: 24vesti.mk
