ГАЗА (АА) – Појасот Газа, кој е под немилосрдни израелски напади од 7 октомври минатата година, се соочува со алармантен недостиг на вода поради целосната блокада наметната од израелските сили, јавува Анадолу.
Жителите на градот Газа, кои со месеци се борат за пристап до чиста вода, сега прибегнуваат кон копање на сопствени бунари, користејќи секаков алат што го имаат на располагање.
Бегалскиот камп „Ал Шати“, кој се наоѓа во западниот дел на градот, е особено тешко погоден од кризата. Без постојан извор на вода, жителите на кампот беа принудени да најдат алтернативни начини за задоволување на своите основни потреби.
Бидејќи на конфликтот не му се назира крајот, ситуацијата од ден на ден станува сѐ покритична.
Палестинските жители на кампот, главно жени и деца, чекаат уморни и жедни, надевајќи се дека ќе најдат извор на чиста вода.
Израел ја продолжува својата брутална офанзива врз Појасот Газа и покрај резолуцијата на Советот за безбедност на Обединетите нации со која се бара итен прекин на огнот.
Според локалните здравствени власти, оттогаш во Газа загинати се повеќе од 36.800 Палестинци, од кои повеќето жени и деца, а над 83.600 се повредени.
Осум месеци по почетокот на израелската војна, големи делови од Газа се во урнатини, додека блокадата на храна, чиста вода и лекови продолжува.
Израел е обвинет за геноцид пред Меѓународниот суд на правдата (МСП), кој во својата последна одлука му нареди на Тел Авив веднаш да ја прекине операцијата во Рафа, каде што повеќе од еден милион Палестинци побараа засолниште од војната.
Извор: Anadolu Agency (AA)
