ПРАГА (АА) – Осум лица ги загубија животите во пожар што избувна во прифатилиште за бездомници во Брно, вториот по големина град во Чешка, известува Анадолу.
Портпаролот на полицијата, Павел Сваб, за печатот изјави дека пожарот избувнал доцна синоќа во областа Комаров во подрачјето на Брно, во прифатилиште во кое претежно живеат бездомници.
Сваб информираше дека за несреќата во која загинале 8 лица е започната голема истрага и додаде дека постои сомневање дека пожарот можеби е подметнат од друг бездомник.
Локалните медиуми објавија дека медицинските тимови не пронашле никој друг што е погоден од пожарот, освен оние кои ги загубиле животите на местото на несреќата.
Премиерот Петр Фиала на социјалната мрежа Твитер им изрази сочувство на роднините на загинатите, истакнувајќи дека инцидентот претставува голема трагедија.
Градоначалничката на Брно, Маркета Ванкова, исто така сподели порака со сочувство, истакнувајќи дека се истражува секој аспект за откривање на причината што го предизвикала овој трагичен настан.
Извор: www.aa.com.tr
