Остин: Немам нови најави за испраќањето борбени авиони за Украина

Што се однесува до евентуалното испраќање на авионите Ф-16 во Украина, немам нови најави за тоа прашање и немам што да додадам, изјави американскиот секретар за одбрана

Прашањето за можното испраќање борбени авиони во Украина се уште е отворено по состанокот на педесет земји за координирање на испраќањето оружје во таа држава.

„Што се однесува до евентуалното испраќање на американските ловци Ф-16 во Украина, немам нови најави за тоа прашање. Немам што да додадам“,

изјави американскиот секретар за одбрана Лојд Остин кој претседаваше со министрите за одбрана на НАТО во седиштето на Алијансата во Брисел.

На прашањето дали Америка ќе се спротивстави на идејата Полска да испрати борбени авиони, Остин одговори: „САД никогаш не ја спречиле Полска да испраќа што сака“.

Тој истакна дека во моментов задача е да се соберат сите видови оружје што веќе и се ветени на Украина.

Дополнително, како што рече Остин, неопходно е да се подготви украинската војска за употреба на овие видови оружје, како и да се обезбеди одржување на сите системи и нивно доставување до линијата на фронтот.

Американскиот министер за одбрана истакна дека сојузниците ќе продолжат да соработуваат со Украина со цел да се задоволат нејзините најитни потреби во областа на одбраната.

Холандија го сфаќа барањето на Украина за Ф-16 многу сериозно, рече холандската министерка за одбрана Кајса Олонгрен при пристигнувањето на состанокот.

„Украина е многу свесна дека ова е нешто на кое му треба време“,

додаде таа.

Борбените авиони, рече таа, не се споредливи со борбените тенкови што ќе и бидат испорачани на Украина во наредните месеци.

Словачка минатата недела објави дека ќе ја разгледа можноста за испраќање на своите МиГ-29 во Украина.

Германскиот министер за одбрана Борис Писториус ја истакна важноста за испраќање муниција и за обука на украинската војска во услови на дебата за потенцијалното снабдување со борбени авиони за Киев.

„Само Германија досега обезбеди специјална обука за 1 200 украински војници “,

рече Писториус во Брисел.

Писториус рече дека „голем предизвик следните неколку месеци“ за Украина ќе биде да не го изгуби воздушниот простор од руските воздушни сили и да избегне уште посилно бомбардирање и напади врз нејзината критична инфраструктура.