ЖЕНЕВА (АА) – Портпаролката на Високиот комесаријат на Обединетите нации (ОН) за бегалци, Олга Сарадо, истакна дека од 15 април досега околу 200.000 лица го напуштиле Судан поради судирите што се во тек во земјата меѓу Армијата и паравоените Сили за брза поддршка (РСФ), јавува Анадолу.
Одржан е неделен брифинг за медиумите под модерација на Роландо Гомес, шеф на Одделот за медиуми и надворешни работи при Дирекцијата за информации во канцеларијата на ОН во Женева.
„Околу 200.000 лица се принудени да ја напуштат земјата поради судирите што се во тек веќе четири недели во Судан. Секој ден сè повеќе лица ја преминуваат границата и се во потрага по безбедност“, рече Сарадо.
Таа истакна дека стотици илјади лица се раселени во границите на земјата, и дека бројни лица се заробени во своите домови поради немање пристап до основите потреби.
Сарадо нагласи дека интервенцијата врз оваа итна состојба во Судан е тешка и скапа.
Инаку, на 15 април избувнаа судири меѓу суданската Армија и паравоените Сили за брза поддршка (РСФ) во Картум и неговата околина.
Во последните месеци меѓу суданската Армија и паравоените Сили (РСФ) се појави несогласување околу интеграцијата на РСФ во Вооружените сили, клучен услов за транзицискиот договор на Судан со политичките групи.
Судан е без функционална влада од октомври 2021 година, кога војската ја собори преодната Влада на премиерот Абдула Хамдок и прогласи вонредна состојба, потег што политичките сили го оквалификуваа како „државен удар“.
Преодниот период на Судан, што започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.
Според Светската здравствена организација (СЗО), во судирите што и понатаму траат во земјата животот го изгубиле 604 лица, а 5.127 лица се повредени.
Извор: www.aa.com.tr
