Ново издание на 360°: „Бугаризација на Македонија“ – интервју со Весела Чернева

Погледнете го новото издание на емисијата „360 степени“, емитувано на 19 мај 2023 г. на ТВ Алсат, во кое гостуваше Весела Чернева – потпретседателка на Европскиот совет за надворешни работи и советничка за надворешна политика на Кирил Петков во периодот кога беше бугарски премиер

Наводите дека официјална Софија сака „бугаризација на Македонија и Македонците”, како и дека усвојување на уставните измени би значело отворање пат за нови и нови бугарски барања и условувања, се дел од темите за кои разговараме со Весела Чернева – потпретседателка на Европскиот совет за надворешни работи (ЕСНР) – призната меѓународна тинк-тенк организација во чиј фокус е европската надворешна и безбедносна политика. Чернева е директорка на канцеларијата на ЕСНР во Софија. Од 2010 до 2013 беше портпаролка и членка на политичкиот кабинет на тогашниот министер за надворешни работи на Бугарија, Николај Младенов, во една од владите на Бојко Борисов. За македонската јавност, Весела Чернева е позната како советничка за надворешна политика на премиерот Кирил Петков. Владата на Петков падна кон средината на 2022 г. по излегувањето на партијата Има таков народ на Слави Трифонов, кој нашуштањето на владејачката коалиција предводена од Продолжуваме со промените го објасни со разидување со Петков на темата – однос кон Северна Македонија. Трифонов обвини дека министерка за надворешни работи не била Теодора Генчовска, кадар на неговата партија, туку советничката на Кирил Петков – Весела Чернева.