ЛОНДОН (АА) – Норвешкиот премиер Јонас Гар Сторе денес силно го критикуваше Израел, велејќи дека војната на Тел Авив во Газа е „варварска“, објавија локалните медиуми, пренесува Анадолу.
Тој ја опишува ситуацијата во Газа како „алармантна и драматична“.
Сторе ја истакна важноста на почитувањето на меѓународното хуманитарно право.
„Кога овие принципи се прекршени, како во Газа, тогаш тоа претставува варварство“, изјави тој за весникот „ВГ“.
Тој ги даде овие изјави во време на предупредувањето на ОН објавено во текот на викендот дека целото население на Северна Газа е во опасност од смрт поради тековната брутална израелска воена офанзива.
„Кога веродостојни извори, како што се ОН, СЗО (Светска здравствена организација), Црвениот крст, Црвената полумесечина и здравствениот персонал праќаат алармантни пораки – тогаш тоа е сериозно“, рече тој.
„Алармантно е кога сме сведоци на неизбежен глад, смрт и болести меѓу стотици илјади ранливи луѓе во северниот дел на Газа. И тоа се случува сега, во наше време. Тие (Палестинците) чувствуваат дека никаде не се безбедни“, додаде Сторе.
Денес норвешкиот премиер ќе отпатува за Исланд за да разговара за ситуацијата во Газа со своите нордиски колеги, пред Нордискиот совет што ќе се одржи утре, објави весникот.
Според локалните здравствени власти, откако Израел започна војна против Газа на 7 октомври минатата година, речиси 43.000 Палестинци се убиени, повеќето жени и деца, а над 100.000 се повредени.
Повеќе од една година по израелската војна огромни делови од Газа се во урнатини, а поради нападите постои недостиг на храна, чиста вода и лекови.
Израел е обвинет за геноцид врз Палестинците пред Меѓународниот суд на правдата (МСП).
Извор: Anadolu Agency (AA)
