АНКАРА (АА) – Најмалку девет Палестинци се убиени денес во уште еден воздушен напад врз училиште на Обединетите нации (ОН) во кое се засолнети раселените цивили западно од градот Газа, изјавија медицински извори, јавува Анадолу.
Дваесет лица се повредени во нападот врз училиштето „Асма“, под управа на Агенцијата на ОН за палестински бегалци (УНРВА) во бегалскиот камп Шати, додадоа изворите.
Ова е втор напад врз истото училиште во рок од неколку дена.
Израелски воздушен напад врз училиштето беше извршен и на 19 октомври, во коишто убиени беа најмалку 10 лица, а повеќемина повредени.
Израел систематски врши напади врз цивилни објекти, како и врз училишта, болници и храмови, во неговата тековна офанзива во Појасот Газа.
Според правилата на војување, таргетирањето на такви цивилни објекти може да претставува воено злосторство.
Непочитувајќи ја резолуцијата на Советот за безбедност на Обединетите нации со која се бара итен прекин на огнот, Израел продолжи со разорната офанзива на Појасот Газа по минатогодишниот напад на палестинската група на отпорот Хамас.
Оттогаш, според локалните здравствени власти, убиени се речиси 43.000 луѓе, главно жени и деца, а над 100.000 се повредени.
Израелската офанзива го расели речиси целото население на Појасот Газа, а тековната блокада доведе до сериозен недостиг на храна, чиста вода и лекови.
Израел се соочува со обвиненија за геноцид пред Меѓународниот суд на правдата за неговите напади врз Појасот Газа.
Извор: Anadolu Agency (AA)
