Прегратките и бакнежите во кампања се многу пријатни, но понекогаш имаат и цена, вели лидерот на Нова демократија
Преку видео објавено на Инстаграм, претседателот на Нова демократија и до неодамна премиер на Грција, Кирјакос Мицотакис, соопшти дека е позитивен на ковид-19 и следните денови ќе ги помине дома, а ја откажа и неговата посета на Света Гора планирана за викендов, јави дописничката на МИА од Атина.
„Прегратките и бакнежите во предизборниот период секогаш се многу пријатни, но понекогаш имаат и цена. Денеска се тестирав за ковид и сум позитивен“,
вели Мицотакис во видеото.
Објаснува дека посетата на Света Гора ќе остане за некој момент во иднината, но и оти ќе продолжи да објавува видеа на ТикТок.
Мицотакис се наоѓа среде кампања за парламентарните избори што треба да се одржат на 25 јуни 2023 година.
Ова ќе бидат втори избори за речиси еден месец откако по гласањето на 21 мај ниту една партија не успеа да освои доволно пратенички места за самостојно да формира влада.
Нова демократија на Мицотакис со над 40 отсто освоени гласови освои огромна предност од околу 20 отсто пред Сириза на Алексис Ципрас. Меѓутоа, не беше доволно за да може неговата партија да има мнозинство во 300-члениот парламент. Освои 146 пратенички мандати поради што не сакаше да прави коалиции и побара нови избори.
На 25 јуни Мицотакис би можел да дојде до посакуваното мнозинство и формирање еднопартиска влада, бидејќи овие избори ќе се спроведат според изборниот закон изгласан во 2020 година според кој ќе се примени мешаниот систем со засилена пропорционална застапеност, што значи и враќање на бонус пратеници за првата партија.
Бонусот нема да биде фиксен од 50 пратеници како претходно (пред да се укине), туку бројот ќе биде во зависност од освоените гласови и ќе се движи меѓу 20 и 50 дополнителни пратенички места.
Извор: 360stepeni.mk
