Министерката најави намалена акциза, а бензинот и дизелот поскапуваат – во што е разликата?

Во речиси исто време кога министерката за финансии Гордана Димитриеска-Кочоска преку Фејсбук објави дека Владата донела одлука за намалување на акцизата на нафтените деривати, Регулаторната комисија за енергетика (РКЕ) соопшти дека од полноќ бензинот ќе поскапи за 3 денари, а дизелот за 6 денари по литар.

На прв поглед, информациите изгледаат контрадикторни, но станува збор за две различни работи. Регулаторната комисија за енергетика соопшти дека од 21 јули во 00:01 часот ќе важат нови максимални малопродажни цени на горивата:

ЕУРОСУПЕР БС-95 – 90 денари за литар;
ЕУРОСУПЕР БС-98 – 92 денари за литар;
ЕУРОДИЗЕЛ БС (Д-Е V) – 94 денари за литар;
Екстра лесно масло за домаќинство – 93 денари за литар;
Мазут М-1 НС – 45,373 денари за килограм.
Со новата одлука, бензините поскапуваат за 3 денари по литар, дизелот за 6 денари, екстра лесното масло за домаќинство за 7 денари, а мазутот за 3,205 денари по килограм.

Во меѓувреме, министерката за финансии Гордана Димитриеска-Кочоска преку објава на Фејсбук информираше дека Владата на вонредна седница донела одлука за намалување на акцизата на нафтените деривати. Според неа, мерката има цел да ги ублажи последиците од кризата на Блискиот Исток, да придонесе за стабилизирање на цените на горивата и индиректно да влијае врз останатите цени во економијата.

Причината за поскапувањето и покрај најавите на министерската е тоа што акцизата е само еден од елементите што ја формираат конечната цена на горивото. РКЕ при пресметката ги зема предвид и движењето на цените на нафтените деривати на светските пазари, курсот на американскиот долар и другите елементи утврдени со методологијата за формирање на цените.

Доколку растот на набавните цени на нафтените деривати е поголем од ефектот што го има намалувањето на акцизата, конечната цена за потрошувачите сепак може да биде повисока. Со други зборови, намалената акциза не значи автоматски и поевтино гориво, туку може само да го ублажи поскапувањето што би било уште поголемо без таа мерка. Затоа, и покрај владината интервенција во акцизата, од полноќ возачите ќе плаќаат повисоки цени за бензинот и дизелот.