Матурантите бараат брзо решение за нивниот проблем зашто полагањето на државната матура почнува на 27 мај
Во најавата, пак, за придружување кон средношколскиот протест, движењето „Студентски отпор“ наведе дека е „крајно време студентот да се избори за своите права и да го искаже револтот на улица, кога институциите немаат слух по повеќемесечните барања на студентите“
Матурантите и студентите денеска од 12:30 часот, пред зградата на Министерството за образование и наука, ќе одржат протест на кој ќе побараат олеснување на полагањето државна матура, но и подобрување на студентскиот стандард.
Протестот го организираат од Организацијата за дијалог и афирмација на средношколците и студентите (ОДАС), како и движењето „Студентски отпор“.
Од ОДАС велат дека целта на протестот е да се истакне значењето на нивните ставови во врска со државната матура и да се забрза носењето соодветно решение. Тие од Владата и Собранието побараа годинашната генерација матуранти да имаат скратен обем на материјал за завршниот испит или да се намали бројот на интерни испити. Причина за ваквите барања, како што велат од ОДАС, е тоа што оваа генерација матуранти немале непрекинато една целосна учебна година во нивното четиригодишно средно образование, а тоа се должи на, според нив, два најголеми фактора во последните четири години – корона-кризата и година и пол онлајн-настава и дојавите за бомби.
Од ОДАС велат дека нивниот проблем бара брзо решение зашто полагањето на државната матура почнува на 27 мај.
Министерот за образование и наука Јетон Шаќири во вторникот изјави дека за ова барање ќе треба да се разгледа дали и што дозволува законот да се промени во овој период за организација на државната матура. Тој најави дека наредната недела ќе има состанок со директорката на Државниот испитен центар (ДИЦ) за уште еднаш, како што рече, „да ја известиме јавноста кои се материјалите и што е предвидено во нив“ и барањето на учениците да се разгледа заедно со Сојузот на средношколци со кој, како што рече, има секојдневна комуникација.
Сојузот на средношколци на Република Северна Македонија, како што пред неколку дена изјави неговиот претседател Лука Павиќевиќ, за една до две недели ќе има состанок на Генералното собрание за да се произнесе по прашањето околу полагањето на државната матура.
Во најавата за придружување кон средношколскиот протест, движењето „Студентски отпор“, пак, наведе дека е „крајно време студентот да се избори за своите права и да го искаже револтот на улица, кога институциите немаат слух по повеќемесечните барања на студентите“.
Студентите се незадоволни од, како што велат, континуираната негрижа од МОН и непочитувањето на законските рокови за исплата на средствата за субвенциониран студентски оброк и за стипендија.
Студентите се незадоволни и од, според нив, нетранспарентните преговори по однос на новиот закон за студентски оброк и додаваат оти засега немаат никакви официјални информации како би се одвивала зголемената исплата од, како што велат, „неверојатни 140 денари“ на дневно ниво.
Додаваат дека МОН доцни и со исплатата на стипендиите – како за оние кои аплицираат по првпат, така и за оние кои ја продолжуваат стипендијата, а незадоволство изразија и поради сè уште незапочнатата реконструкција на студентските домови која МОН ја најави за почетокот на годинава.
ИЗВОР: 360stepeni.mk
