Секретаријатот за европски прашања (СЕП), со кој раководи тој, исто така доби покана да номинира свој претставник во работната група. Вицепремиерот не сака да открива кои имиња се во игра, но в понеделник најави дека тоа ќе биде дефинирано и ќе соопштат кого ќе номинираат
Вицепремиерот за европски прашања Бојан Маричиќ денеска ги повика политичките партии да номинираат свои претставници во работната група за уставни измени, за што рокот што го даде Министерството за правда истекува в понеделник (10 април).
„Јас не гледам причина која било партија да одбие учество во тој процес. Ние ќе се трудиме и понатаму да ги убедиме дека треба да учествуваат во ова во кој било формат. Кој потврдил, кој не, треба да прашате во Министерството за правда бидејќи тие го водат процесот. Навистина е неблагодарно да зборувам во нивно име“,
рече Маричиќ на заедничка прес-конференција во Скопје со српската министерка за евроинтеграции Тања Мишчевиќ.
Логично е прашањето, вели тој, зошто е валидно да се соопштуваат ставовите на прес-конференции и преку изјави секојдневно, а е проблематично истите тие ставови или некои други да се изнесат и дискутираат во работната група.
„Мислам дека е многу попрактично, поодговорно и подобро и за државата и за граѓаните да земат учество сите политички партии, да не се плашат и да земат учество. Бидејќи и јавно ги изнесоа ставовите, тие ставови да ги соочиме во работната група и да видиме дали можеме да дојдеме до едно заедничко решение, најдобро решение и да изградиме еден македонски модел за вградување на овие три заедници кои се заинтересирано да влезат во преамбулата на Уставот. Сметам дека на тој начин ќе се демистификува процесот повеќе отколку ако го задржиме на ниво на дневни изјави и политички препукувања. Ние постапуваме одговорно, ја поставуваме масата за разговор и ги каниме сите да седнат и да разговараме“,
вели Маричиќ.
Секретаријатот за европски прашања (СЕП), со кој раководи тој, исто така доби покана да номинира свој претставник во работната група. Вицепремиерот не сака да открива кои имиња се во игра, но в понеделник најави дека тоа ќе биде дефинирано и ќе соопштат кого ќе номинираат.
„СЕП ќе земе активно учество во таа група, сè уште немаме дефинирано кој ќе нè претставува, но најдоцна во понеделник ќе испратиме допис до Министерството за правда со кој ќе номинираме лице. Секако ќе биде лице со искуство и лице кое долго работи по тие прашања и може да даде придонес во работната група“,
најави Маричиќ.
Тој посочи дека се разговарало со повеќе експерти за да учествуваат во процесот, но дел од нив сè уште официјално не потврдиле или не добиле официјална покана. Тоа, вели, беа неформални разговори, но смета дека ќе има квалитетна група која ќе работи на уставните измени.
Покрај СЕП, од другите институции, Министерството за правда испрати допис да номинираат свои претставници-експерти и Министерството за надворешни работи и кабинетот на претседателот Стево Пендаровски, како и сите партии во парламентот.
ИЗВОР: 360stepeni.mk
