Ливерпул со нов пораз, Јунајтед победи против Кристал Палас

Ливерпул не запира со бламажите, па денеска „црвените“ доживеаа пораз со убедливи 0-3 на гостувањето кај Вулверхемптон, за четврти меч по ред во Премиерлигата без триумф и веќе безмалку загубени шанси за битката за место во ЛШ во идната сезона.

Дека на Ливерпул му се заканува катастрофа беа потребни 12 минути од стартот на мечот, откако Матип си даде автогол, а Досон ја дуплираше предноста, па на средина од вториот дел Рубен Невеш само ги дотолчи „црвените“ за убедливиот пораз.

Ливерпул остана на 29-те бода на десеттото место, а Вулфс избегаа од опасната зона со триумфот и сега имаат 20 на 15-та позиција.

Манчестер јунајтед се врати на победничкиот колосек, иако во завршните 15 минути се тресеа за триумфот против Киристал Палас, откако останаа со десетмина по исклучувањето на Касемиро, а Шлуп го врати лондонскиот тим во мечот со гол во 76-та минута.

Бруно Фернандеш и Маркус Рашфорд претходно дадоа по еден гол, кои на крај се покажаа доволни за три бода и 42 на контото на третата позиција, три зад Манчестер сити, а осум зад Арсенал кој загуби денеска од Евертон.

Астон Вила загуби од Лестер со 2-4, Брентфорд го збриша фенерџијата Саутемптон со 3-0, а минимално победи Брајтон против Бормут со 1-0