БРИСЕЛ (АА) – На Самитот кој заврши утрово, лидерите на Европската Унија решија да ги зајакнат надворешните граници на Блокот и да се фокусираат повеќе на спречување на нерегуларната миграција, јавува Анадолу.
„Ќе дејствуваме за да ги зајакнеме нашите надворешни граници и да ја спречиме нерегуларната миграција“, рече претседателката на Европската комисија, Урсула фон дер Лајен, на прес-конференцијата на затворањето на лидерскиот Самит.
Таа објасни дека ЕУ ќе воспостави „пилот-проекти“ за зајакнување на заштитата на границите, и со материјална опрема и со персонал за справување со барањата за азил и враќањата на мигрантите.
Зајакнатата гранична контрола ќе биде финансирана од заедничкиот буџет на ЕУ, и покрај претходниот став на Фон дер Лајен која го отфрли финансирањето на граничните огради со пари на ЕУ.
Во заклучоците од Самитот, лидерите на ЕУ конкретно од извршното тело на ЕУ побараа „веднаш да ги мобилизира фондовите и средствата на ЕУ за поддршка на земјите членки во зајакнувањето на капацитетите и инфраструктурата за заштита на границите, средствата за надзор, вклучително и воздушниот надзор и опрема“.
Како што објасни Фон дер Лајен, ЕУ „ќе обезбеди интегриран пакет на мобилна и стационарна инфраструктура, од автомобили до камери, од стражарски кули до електронски надзор“, според новите пилот-проекти.
Лидерите на ЕУ, исто така, се согласија да го забрзаат безбедното враќање на оние мигранти чии барања за азил се одбиени.
„Со помош на релевантните агенции на ЕУ, новите пилот-проекти ќе се фокусираат и на граничните процедури за најефикасно регистрирање, брзи и фер процедури за азил и начините за постапување со враќањата [на мигрантите]“, додаде Фон дер Лајен.
„За таа цел, земјите отсега заемно ќе ги признаваат одлуките за враќање за да избегнат двојно аплицирање“, рече Фон дер Лајен.
Освен тоа, лидерите ја повикаа Агенцијата за азил на ЕУ да работи на концептот на „безбедни трети земји и безбедни земји на потекло“ од каде што Блокот нема да прифаќа барања за азил.
Со овој потег, ЕУ се обидува да формира заедничка листа на безбедни земји што ќе ја користат сите земји членки на ЕУ, кои во моментов се слободни да одлучат дали прифаќаат барања за азил или не.
Лидерите на ЕУ, исто така, разговараа и за економските прашања, како и за поддршката на ЕУ за Украина, вклучувајќи ја и воената помош, за повеќе санкции против Русија и понатамошна употреба на замрзнатиот руски имот.
Украинскиот претседател Владимир Зеленски за првпат учествуваше лично на Самитот, а оствари и билатерални разговори со лидерите на ЕУ.
Извор: www.aa.com.tr
