Курти со нос како Пинокио, бели знамиња и димни бомби на протест во Приштина против договорот од Охрид

Поддржувачите на Социјалдемократската партија бараа оставка од премиерот на Косово. Тие од јарболите пред владината зграда го симнаа знамето на Косово и поставија бели знамиња алудирајќи дека, според нив, Курти се предал кога дал согласност за договорот во Охрид

Поддржувачите на вонпарламентарната Социјалдемократска партија денеска излегоа на протест и фрлаа димни бомби околу зградата на владата во Приштина, незадоволни од договорот во Охрид со кој, меѓу другото, е предвидено формирање на Заедницата на српските општини на Косово.  

Неколку стотици симпатизери на оваа партија, која е формирани од незадоволни функционери на движењето Самоопределување на премиерот Абин Курти, најпрвин организираа протестна прошетка низ централното шеталиште во Приштина, а потоа се собраа околу зградата на владата на Косово, пренесува РТС.  

Тие носеа маски со ликот на премиерот Курти, на кои тој беше прикажан со издолжен нос како Пинокио, литературниот лик на кого му расте носот секогаш кога ќе каже лага.  

Поддржувачите на Социјалдемократската партија бараа остава од премиерот на Косово.  

Тие од јарболите пред владината зграда го симнаа знамето на Косово и поставија бели знамиња алудирајќи дека, според нив, Курти се предал кога дал согласност за договорот во Охрид.  

Демонстрантите потоа фрлија неколку димни бомби кои за кратко време го прекрија со густ црн час влезот на заградата на владата на Косово.  

Полициски екипи го обезбедуваа влезот на владината зграда додека траеше протестот, за време на кој немаше други инциденти.  

И покрај поканата да се приклучат, опозициските партии и нивните активисти, кои исто така се против договорот од Охрид, сепак, одлучија да не присуствуваат на протестот.  

Косовскиот премиер Албин Курти и српскиот претседател Александар Вучиќ пред точно една недела постигнаа согласност за анексот за имплементација на Договорот за патот за нормализирање на односите меѓу Белград и Приштина.  

„Имаме договор и согласност како да го направиме тоа. Косово и Србија се договорија за Анексот за имплементација на Договорот за патот за нормализирање на односите меѓу Косово и Србија. Договоривме кога, кој и како тоа да се реализира. Во рамките на анексот, страните се согласија да ги исполнат сите членови од договорот и да ги спроведат сите обврски без одлагање и со добра волја“,

рече високиот претставник на Европската Унија за надворешни работи и безбедносна политика Жозеп Борел по дванаесетчасовните преговори во Охрид.  

Тој го спомна и членот 7 од Договорот, за кој многу се разговарало, а кој се однесува на „самоуправување на српската заедница на Косово“.