Без разлика кој и каква позиција извршува и дали припаѓа на некоја политичка партија може да биде санкциониран за злоупотреби. Такви случаи има и немало пардон за никого, истакна денеска премиерот Димитар Ковачевски, одговарајќи на новинарско прашање по презентацијата на втората инвестиција на германската компанија „Гересхајмер“ во ТИРЗ Скопје.
Етичката и моралната одговорност, како што посочи премиерот, се санкционира согласно Етичкиот кодекс донесен од страна на Владата и важи за сите именувани функционери во надлежност на Владата.
-Доколку некој има сомнежи за одредени злоупотреби, тогаш стојат на располагање сите институции тоа да се поднесе и да биде процесуирано и санкционирано согласно законите на државата. Имаме правен систем со кој се санкционира секаква злоупотреба од кој било вид без притоа некој да е привилегиран по кој било основ. Јас тоа го потврдив преку одреден број разрешувања и именувања на функционери токму од причини на сомнежи на несоодветно извршување на работите, рече Ковачевски.
Додаде дека сѐ што доаѓа како информација за одредени сомнежи до Владата за несоодветно постапување, преку Канцеларијата на вицепремиерот за добро владеење се процесира до соодветните институции и за тоа досега немало ниту еден исклучок.
ИЗВОР: kurir.mk
