Во Газа, каде на власт е исламистичкото движење Хамас, Министерството за здравство објави 28 загинати, меѓу кои и деца, а повеќе од 90 се ранети од вторникот. Меѓу загинатите има и најмалку 10 цивили, што за Обединетите нации е неприфатливо
Едно лице загина во денешниот палестински ракетен напад, што е прва жртва на израелска страна од почетокот на ракетниот напад од Појасот Газа, а на палестинска страна досега загинаа 28 лица во тридневната размена на оган меѓу Израел и палестинските вооружени групи, а крајот не се гледа и покрај напорите за посредување.
Едно лице загина денеска во Реховот, јужно од Тел Авив, а неколку други се ранети кога палестинска ракета погоди станбена зграда, соопшти полицијата и спасувачките служби. Додека палестинските ракети паѓаат врз центарот и јужниот дел на земјата на Израел, израелската армија врши воздушни напади врз Појасот Газа.
Таа ескалација на насилството, најголемата меѓу Газа и Израел од август 2022 година, започна во вторникот со израелските напади на палестинската територија, особено врз Исламскиот џихад, организација која Израел, Европската унија и САД ја сметаат за терористичка.
Претходно денеска Израел објави дека лидерот на палестинскиот Исламски џихад Али Гали е убиен во израелските воздушни напади врз Појасот Газа. Командантот на ракетната единица на бригадата Ал Кудс, военото крило на Исламски џихад, Али Гали е четвртиот висок командант на исламистичката група убиен во последните денови во израелските воздушни напади врз Појасот Газа.
Во Газа, каде на власт е исламистичкото движење Хамас, Министерството за здравство објави 28 загинати, меѓу кои и деца, а повеќе од 90 се ранети од вторникот. Меѓу загинатите има и најмалку 10 цивили, што за Обединетите нации е неприфатливо.
Според последните податоци објавени од војската, од почетокот на нападот во средата од Газа биле истрелани 547 ракети на израелска територија, од кои 175 биле пресретнати од израелскиот систем за противвоздушна одбрана. Денеска израелската армија извести дека погодила 166 цели во Појасот Газа, вклучувајќи ракетни бази и вооружени групи.
Вчера, израелскиот премиер Бенјамин Нетанјаху изјави дека Израел му го „нанесе најтешкиот удар на Исламскиот џихад во неговата историја“.
Извор: 360stepeni.mk
