Според резултатите од ЦИК, во новиот состав на бугарскиот парламент ќе има шест партии. Борисов со минимална предност го победи Петков, а уште помала е разликата помеѓу третата и четвртата партија. ИТН на Слави Трифонов успеа да го надмине изборниот праг и да си обезбеди место во Народното собрание
Централната изборна комисија (ЦИК) на Бугарија ги обработи 100 отсто од гласовите на вчерашните парламентарни избори и според резултатите во новиот состав на бугарскиот парламент ќе влезат шест партии односно коалиции.
Речиси изедначената трка за првото и за третото место ја потврдија и резултатите кои ги соопшти ЦИК. Според нив, прва со најмногу гласови е коалицијата ГЕРБ-СДС на поранешниот премиер Бојко Борисов. Таа има 49 769 гласа повеќе или помалку од два отсто од второпласираната коалиција на Кирил Петков – Продолжуваме со промените-Демократска Бугарија (ПП-ДБ).
Тесна е разликата и помеѓу трето и четвртопласираната партија – националистичката преродба и турската ДПС. Разликата помеѓу нив е 10 730 гласа.
Има таков народ (ИТН) на Слави Трифонов, според овие резултати, успеала да го надмине изборниот праг од 4 отсто освоени гласови и ќе биде шеста партија во Народното собрание.
Резултатите по 100 отсто обработени гласови од ЦИК, како што јавува БНТ, се следните:
- ГЕРБ-СДС – 26,51 отсто (669 361 глас);
- ПП-ДБ – 24,54 отсто (619 592 гласови);
- „Преродба“ – 14,15 отсто (357 167 гласови);
- ДПС – 13,72 отсто (346 437 гласови);
- БСП – 8,94 отсто (225 814 гласови);
- ИТН – 4,11 отсто (103 641 гласови).
Под прагот од 4 отсто освоени гласови, пак, останаа Бугарски подем на поранешниот технички премиер Стефан Јанев со 3,08 отсто освоени гласови (77 804) и Левица со 2,24 отсто (56 453 гласови).
Вчерашните парламентарни избори во Бугарија беа петти по ред во период од две години бидејќи по претходните четири изборни циклуси ниту една партија не успеа да формира стабилна коалиција за политичка влада.
Извор: 360stepeni.mk
