Молдавија, земја која некогаш се наоѓаше во сферата на руско влијание, сега е предводена од цврсто проевропска власт, како и соседна Украина, која повеќе од една година се бори против инвазијата на руските трупи
Портпаролот на Советот за национална безбедност на САД Џон Кирби, денеска ја обвини Русија дека се обидува да ја дестабилизира Молдавија, меѓудругото и со демонстрации, со цел во земјата да инсталира влада што ќе ја поддржува.
„Сметаме дека Русија се обидува да ја ослабне владата на Молдавија, секако со крајна цел да види за себе поповолна администрација на чело на земјата“,
изјави портпаролот на Советот за национална безбедност на САД.
Молдавија, земја која некогаш се наоѓаше во сферата на руско влијание, сега е предводена од цврсто проевропска власт, како и соседна Украина, која повеќе од една година се бори против инвазијата на руските трупи.
Молдавија во јуни лани, заедно со Украина, доби статус на кандидат за членство во ЕУ, но од почетокот на војната во Украина се соочува со зголемен притисок од Москва.
Претседателката на Молдавија Маја Санду, минатиот месец изјави дека Кремљ планира државен удар во нејзината земја.
Вашингтон верува дека Москва се обидува да го дестабилизира Придњестровје, проруски сепаратистички регион во Молдавија.
Оваа територија на границата со Украина прогласи независност, но не е призната од ниту една земја. Властите на Придњестровје вчера соопштија дека го спречиле атентатот на нивните лидери, што му го препишаа на Киев.
Украина ги отфрли ваквите сериозни обвинувања.
„Руските актери, од кои некои се поврзани со руските разузнавачки служби, се обидуваат да организираат демонстрации во Молдавија и преку нив да поттикнат бунт против молдавската Влада“,
рече Кирби.
Тој додаде дека САД имаат доверба во демократските и економските институции на Молдавија и нивната способност да одговорат на овие закани и дека САД ќе продолжат да им даваат „голема поддршка“.
Извор: 360stepeni.mk
