Кирби: Има мало американско воено присуство во американската амбасада во Украина

Прашан за „протечените“ доверливи документи на Пентагон кои сугерираат дека во Украина има американски специјални сили кои дејствуваат во земјата разурната од војна, Кирби рече дека нема да објаснува во детали

Портпаролот на Советот за национална безбедност на Белата куќа, Џон Кирби, денеска за „Фокс њуз“ откри дека во американската амбасада во Украина има „мало присуство на американската војска“, но нагласи дека „нема промена во одлуката дека нема да има американски војници кои се борат во Украина во оваа војна“.

Прашан за „протечените“ доверливи документи на Пентагон кои сугерираат дека во Украина има американски специјални сили кои дејствуваат во земјата разурната од војна, Кирби рече дека нема да објаснува во детали.

„Прецизно да одговорам на прашањето: да, има мало американско воено присуство во амбасадата во Киев поврзано со Канцеларијата на аташеата за одбрана. Тие ни помагаат да работиме на одговорноста за материјалот што влегува и излегува од Украина“,

рече Кирби, мислејќи притоа на оружјето и другата воена поддршка што САД ја испраќаат во Киев.

Кирби, кој зборуваше на маргините на патувањето на претседателот Џо Бајден во Северна Ирска, истакна дека тие специјални сили не се борат на бојното поле, но од „Фокс њуз“ додаваат дека американските сили во Киев обезбедуваат и безбедносни услуги.

„Нема промена на ставот на претседателот дека во Украина нема да има американски војници кои се борат во оваа војна“,

нагласи Кирби.

Зборувајќи за односите на САД со сојузниците по објавувањето на доверливите информации, Кирби додаде:

„Правиме отворени обиди да допреме до релевантните сојузници и партнери за да им објасниме најдобро што знаеме што умееме. И ние не знаеме многу во моментов, но мора да се увериме дека тие разбираат оти ова го сфаќаме многу сериозно, дека отворивме кривична истрага и контроли низ Министерството за одбрана за да ги утврдиме последиците по националната безбедност.“

Кирби додаде дека Вашингтон не зне што друго може да поседува поединецот или луѓето што ги објавуваат овие документи, и што сè уште може да објават.

„Нема да зборувам за содржината на некои од овие обелоденети документи. Мислам дека сфаќате оти правиме се што мора за да ја заштитиме нашата национална безбедност. Ова е повреда на напата способност да заштитиме некои информации и ние сериозно го сфаќаме тоа“,

додаде тој.