Кинески воени бродови денеска почнаа со вежби со вистински оган како дел од тридневната воена вежба која Кина ја нарекува „предупредување“ за протајванските сили за независност.
Амфибискиот десантен брод – за транспорт на војници, авиони и возила – утрово истрела неколку гранати во областа на заливот Луојан во близина на брегот на провинцијата Фуџијан, на околу 50 километри северозападно од островот Мацу во близина на копно под контрола на Тајван.
Овие вежби започнаа само неколку часа откако претседателката на Тајван, Цаин Инг-вен се врати од патувањето во САД, каде што таа имаше состанок со претседателот на Претставничкиот дом на САД, Кевин Мекарти во Калифорнија. Оваа посета, кинеските власти ја нарекоа провокација и уште еднаш истакнаа дека Тајван е нераскинлив дел од Кина
„Овие операции служат како строго предупредување против дослух меѓу сепаратистичките сили кои бараат „независност на Тајван“ и надворешните сили и против нивните провокативни активности. Тие се неопходни за да се зачува националниот суверенитет и територијалниот интегритет на Кина“,
велат од Пекинг.
Тајванското Министерство за одбрана соопшти дека 42 кинески воени авиони и осум бродови ја преминале средната линија на Тајванскиот теснец. Оваа линија е всушност неофицијална линија на поделба меѓу кинеската и тајванската територија. Од таму изјавија дека Кина ја искористи посетата на тајванската претседателка на САД за спроведување на овие вежби со што се поткопува мирот, стабилноста и безбедноста на целиот регион.
Тридневната операција под името „Обединет остар меч“ ќе трае до понеделник, а додека траат вежбите ќе бидат организирани и патроли кои ќе напредуваат околу Тајван.
Извор: 360stepeni.mk
