НАЈРОБИ (АА) – Бројот на починати следбеници на култот на изгладнување во Кенија се искачи на 150, откако беа ексхумирани уште неколку тела, соопшти полицијата, јавува Анадолу.
Уште пет тела се откопани во шумата Шакахола во округот Килифи, интензивирајќи ја тековната истрага за култот на изгладнувањето, предводен од проповедникот Пол Мекензи.
Регионалниот комесар Рода Онјанча вчера упати соопштение до медиумите во кој ги открива мрачните наоди.
Онјанча истакнува дека 594 лица, за кои постои сомнение дека се членови на култот, се пријавени за исчезнати од нивните семејства, и дека извршени се 25 апсења.
Собрани се примероци на ДНК од 93 семејства додека потрагата и ексхумацијата продолжува во шумата Шакахола.
И понатаму се во тек напорите за откривање на вистината зад активностите на култот и околностите околу смртта.
Ексхумациите беа прекинати поради лошите временски услови, но продолжија по неколку дена.
Полициската истрага која започна во средината на април досега откри дека на некои од жртвите им недостасуваат органи, што доведе до сомневања за трговија со органи.
Министерот за внатрешни работи, Китур Киндики, во врска со смртните случаи на култот Шакахола изјави дека се поврзани со високо организиран криминал, истакнувајќи дека постојат многу масовни гробници.
Извор: www.aa.com.tr
