реклама
На Мицкоски не му е до промена на Пржинската Влада, туку единствената цел му е да нема премиер Албанец во 100 дена пред изборите. Ова го истакна потпретседателот на ДУИ Бујар Османи откако од ВМРО-ДПМНЕ излегоа со став за измена на Законот за Влада со цел да нема можност премиер од редовите на ДУИ во техничка влада. Османи вели дека за такво нешто на овие избори нема простор, а воедно и поради договорот со коалицискиот партнер СДСМ.
„Лидерот на опозицијата Пржинската Влада ја наметна како тема во функција на премиер Албанец. Значи прво треба да се издвојат тие две теми. За првата нема простор, бидејќи нема ни причина зашто двата коалициски партнери се имаат усогласено за тоа. Но за Пржинската Влада простор нема за овие избори. За наредните избори можеме да разговараме.“, изјави Османи.
На ист став е и СДСМ.
„100 дена пред изборите во 2024 година во Македонија ќе има техничка Влада како што налага и Законот за Влада. СДСМ во изминатите години создаде амбиент и се одржаа фер и демократски избори и може да се разговара за укинување на техничката Влада но во некои наредни изборни циклуси, за што треба и политички консензус од сите политички партии“, изјави Дарко Каевски.
Од ВМРО-ДПМНЕ и денеска повторија дека бараат укинување на Техничката влада само да нема премиер од редовите на ДУИ.
„ВМРО-ДПМНЕ ќе се откаже веднаш од техничка влада, доколку криминалната партија ДУИ нема технички премиер, а СДС има храброст на ДУИ да му рече доста е. Би било срам за државата, партија од типот на ДУИ, каде криминалот со СДС им е секојдневие, да има технички премиер. Затоа ВМРО-ДПМНЕ е спремно веднаш да се откаже од техничка влада, доколку се откаже ДУИ од технички премиер“, велат од ВМРО-ДПМНЕ.
Се очекува на почетокот на идниот месец да биде закажана средба на партиите во кои точно ќе се дефинира датумот на изборите, по што треба да се одреди и точниот датум од кога ќе биде избрана Пржинската влада.
реклама
реклама
