Хуго Лорис долги години беше капитен на Франција и сите гледаа на него како на вистински пример во тимот, но од денеска натаму, Дидие Дешамп ќе мора да бара нов лидер во француската репрезентација.
Дешамп пред два дена го продолжи договорот со Франција и останува национален селектор уште три години, а вечерва доби вест дека веќе нема да може да смета на искусниот голман на Тотенхем.
Лорис реши да стави крај на репрезентативната кариера на 36-годишна возраст, па така поразот во финалето со Аргентина е негов последен меч за националниот тим.
– Едноставно доаѓа време кога мора да ги предадете ракавиците на некој друг. Oтсекогаш сум велел и повторувал дека францускиот тим не му припаѓа никому и мораме сите да се погрижиме да биде така. Јас како капитен, мора да бидам пример за останатите.Тимот е подготвен да продолжи, имаме и голман кој е подготвен (Мајк Мењон). Претпочитам да си одам кога сум во најдобра форма, подобро тоа отколку да чекам пад или премногу конкуренција. Имам и семејни прични, чувствувам потреба да поминувам повеќе време со сопругата и децата, – изјавил Лорис за „Лекип“.
Лорис 14 години беше прв голман на Франција, собра вкупно 145 настапи за репрезентацијата, на 121 беше капитен, а одигра на вкупно четири Светски првенства. Двапати играше во големото финале и во 2018-та година стана светски првак, а играше и во финалето на Европското првенство во кое Франција загуби од Португалија.
ИЗВОР: kurir.mk
