Одлуката на Отава доаѓа неколку дена откако Европската комисија воведе слична забрана и е знак на зголемена загриженост поради кинеската апликација за социјални медиуми за која се верува дека е блиска до владејачката Комунистичка партија и собира податоци за корисници ширум светот
Канада денеска ја блокираше кинеската апликација за социјални медиуми TикТок од уредите на владините службеници, нагласувајќи дека претставува „неприфатлив“ ризик за приватноста и безбедноста.
Канада им оневозможи на федералните вработени да ја преземат апликацијата, се вели во соопштението на секретаријатот на канадското Министерство за финансии.
Во него се наведува дека методите со кои TикТок собира податоци овозможуваат значителен пристап до содржината на телефонот.
TикТок соопшти дека е разочаран од одлуката на Канада, која е донесена „без наведување на какви било конкретни безбедносни грижи“.
Кинеската компанија додаде дека не била контактирана од канадските власти за „да разговараат за какви било прашања пред да донесат одлука“, напиша нејзиниот портпарол.
Одлуката на Отава доаѓа неколку дена откако Европската комисија воведе слична забрана и е знак на зголемена загриженост поради кинеската апликација за социјални медиуми за која се верува дека е блиска до владејачката Комунистичка партија и собира податоци за корисници ширум светот.
Извор: 360stepeni.mk
