ТОКИО (АА) – Јапонскиот премиер Фумио Кишида ја истакна важноста на редот заснован врз владеењето на правото, потсетувајќи на неговата минатонеделна посета на Украина, каде што Русија продолжува со нападите, јавува Анадолу.
Кишида зборуваше за руско-украинската криза во видеопораката што ја прати на „Вториот самит за демократија“ организиран под покровителство на САД, Костарика, Холандија, Јужна Кореја и Замбија.
Ветувајќи дека ќе го преземе водството во заштитата и зајакнувањето на меѓународниот поредок заснован врз владеењето на правото како претседавач на Г7, Кишида потсети на тоа што го видел во Украина минатата недела.
„Со свои очи видов докази за агресијата на Русија и слушнав директно од оние што ги доживеаја овие злосторства“, рече Кишида.
Во својата порака јапонскиот премиер вети дека неговата земја ќе игра улога во обуката на повеќе од 1.500 судии и административни службеници од различни земји и региони, особено од Азија.
Самитот на лидерите на Г7, чиј домаќин е Јапонија, ќе се одржи во мај во југозападниот град Хирошима.
Извор: www.aa.com.tr
