ЛИЛОНГВЕ (АА) – Малавискиот воен хеликоптер со потпретседателот на земјата Саулос Чилима и уште осум лица исчезна вчера, соопшти Владата, јавува Анадолу.
Саулос Чилима требаше да присуствува на погребот на поранешниот министер за правда Ралф Касамбара и патуваше со хеликоптер од главниот град Лилонгве кога исчезна од радарот за време на летот на северот на земјата.
„Претседателот на Малави, Лазарус Чаквера, го откажа планираното патување во странство и им нареди на регионалните и националните агенции да ги интензивираат операциите за пребарување и спасување“, се вели во соопштението од кабинетот на претседателот.
Во последните години во хеликоптерски несреќи загинаа повеќе официјални претставници, вклучително и неодамнешната несреќа во која загинаа иранскиот претседател Ебрахим Раиси и неговата делегација. Неодамна во слична несреќа загина кенискиот генерал Френсис Огола.
Извор: Anadolu Agency (AA)
