Во соопштението на руското МНР, меѓу другото, се наведува дека одлуката за суспензија на Договорот може да биде реверзибилна доколку Вашингтон покаже политичка волја да вложи напори за деескалација и да создаде услови за продолжување на целосното функционирање на Договорот
Откако рускиот претседател Владимир Путин во своето денешно обраќање најави оти Русија го суспендира учеството во Договорот за намалување на стратегиското оружје (СТАРТ), руското Министерство за надворешни работи информрира дека Москва ќе продолжи да се придржува кон пропишаните квантитативни ограничувања на стратешкото офанзивно оружје, со цел, како што се вели, да се одржи доволен степен на предвидливост и стабилност во нуклеарната ракетна сфера.
Во соопштението на руското МНР, меѓу другото, се наведува дека одлуката за суспензија на Договорот може да биде реверзибилна доколку Вашингтон покаже политичка волја да вложи напори за деескалација и да создаде услови за продолжување на целосното функционирање на Договорот.
„Ја повикуваме американската страна да го стори токму тоа. Дотогаш, каков било наш чекор кон Вашингтон во контекст на СТАРТ апсолутно не доаѓа предвид“,
се наведува во соопштението на МНР на Русија.
Во соопштението, руското МНР ги повикува САД на воздржаност од преземање какви било чекори кои би можеле да го спречат продолжувањето на Договорот Нов СТАРТ во случај да се создадат неопходни услови за тоа.
„Убедени сме дека потенцијалот на Договорот во однос на неговиот придонес во зајакнувањето на меѓународната безбедност и стратешката стабилност е далеку од исцрпен. Сепак, тој ќе може целосно да се отвори само доколку се вратат можностите за симетрично, еднакво и темелно спроведување на Договорот СТАРТ од двете страни“,
посочуваат од Министерството.
Оттаму додаваат дека и внимателно ќе ги следат понатамошните дејствија на САД и нивните сојузници како на полето на стратешкото офанзивно оружје, така и воопшто во полето на меѓународната безбедност и стратешката стабилност.
Извор: 360stepeni.mk
