И покрај одложувањето на судските реформи, израелскиот премиер Нетанјаху вели оти тие се неопходни

„Поради одговорност кон нацијата, решив да го одложам гласањето, за да дадам време за дискусија“, рече израелскиот премиер, но инсистираше на тоа дека реформата е неопходна

Израелскиот премиер Бенјамин Нетанјаху вечерва ѝ се обрати на нацијата, потврдувајќи дека се одложува процесот за воведување на судските реформи кој предизвика масовни протести и блокади ширум земјата.

Тој рече дека е свесен за тензиите кои ги предизвика предложената реформа во правосудството и додаде дека го слуша гласот на народот.

„Поради одговорност кон нацијата, решив да го одложам гласањето, за да дадам време за дискусија“,

рече премиерот на Израел.

Сепак, одложеното гласање, за израелскиот премиер, не значи и целосно отфрлање на реформите.

Нетанјаху рече дека ќе го одложи второто и третото гласање на законот до крајот на паузата на израелскиот парламент во април, за да даде време за дебата, но инсистираше на тоа дека реформата е неопходна.

Непосредно по обраќањето на израелскиот премиер, лидерот на работничкиот синдикат „Хистадрут“ повика на прекин на генералниот штрајк во Израел, кој беше инициран како протест на најавената реформа во судството.

„Од овој момент генералниот штрајк престанува. Но, ако премиерот се врати на агресивното законодавство, ќе не најде пред него. Законодавството без согласност повторно ќе доведе до генерален штрајк“,

објави Арнон Бар Давид, лидерот на работничкиот синдикат „Хистадрут“.

Во меѓувреме, САД и Велика Британија ја поздравија одлуката на израелскиот премиер со која се паузира процесот на носење на спорниот план за судски реформи.

Претходно денеска, израелскиот министер за национална безбедност Итамар Бен Гвир соопшти дека се согласил со премиерот Бенјамин Нетанјаху за одложување на легислативата во периодот до 30 април, кога Кнесетот (парламентот на Израел) ќе биде на пауза поради празникот Пасха.

Гвир, кој е и лидер на екстремно десничарската партија Еврејски сили, сепак, инсистира на тоа дека законот за реформи во правосудството ќе дојде на гласање во летниот мандат на парламентот кој трае од 30 април до 30 јули.

Изјавата на израелскиот министер за национална безбедност дојде во момент кога делови од Израел се целосно блокирани поради масовните протести против планот за реформи во правосудството, но и поради отпуштањето на министерот за одбрана на Израел кој се изјасни против ваквите реформи.

Предлог-реформите во правосудството беа објавени од израелската влада во јануари годинава, тврдејќи дека тие се потребни за да се врати рамнотежата меѓу извршната и судската власт во земјата. Реформите ќе ѝ дадат на владата влијание во изборот на судии и ќе ја ограничат моќта на Врховниот суд да ги укинува законите.