Родово базираното насилство во Северна Македонија е комплексен проблем кој бара системски пристап и поддршка од сите општествени актери. Но, еден од најголемите предизвици останува начинот на кој медиумите известуваат за овие случаи.
Анализите покажуваат дека доминацијата на дневнополитичките теми, ограничените редакциски ресурси и недостатокот на специјализирани извори доведуваат до недоволно и површно третирање на прашањето за родовата еднаквост. Експертите предупредуваат дека сензационализмот и користењето стереотипи дополнително го поткопуваат јавниот дискурс и прават штета на жртвите, анализира МИА.
Етички стандарди и континуитет во информирањето
Марина Тунева, експерт за медиумски прашања, нагласува дека етичкото и одговорно известување може да биде значаен фактор во подигнувањето на свеста и заштитата на жртвите.
„Медиумите треба да го избегнуваат сензационалистичкиот пристап и да обезбедат континуитет во известувањето. Тоа подразбира истражување на причините за насилството, евалуација на работата на институциите и укажување на системските недостатоци“, вели Тунева.
Промените во уредувачките политики и изградбата на капацитетите на новинарите се клучни за подобрување на медиумското покривање на оваа тема.
Реформа на медиумската агенда
„Треба да се постави приоритет на родово базираните теми, а уредниците да ја препознаат нивната важност. Информирањето мора да биде сензитивно, со вклучување и на мажите во редакциите, како важен дел од дебатата“, додава Тунева.
Во оваа насока, „Водичот за мониторинг на стандардите за известување за родово базираното насилство“, издаден од Агенцијата за аудио и аудиовизуелни медиумски услуги, ги истакнува медиумите како клучен фактор за превенција и едукација. Одговорното известување не само што ги информира граѓаните, туку и поттикнува институциите да преземат ефикасни мерки.
Поддршка на жртвите и одговорност на медиумите
Министерството за внатрешни работи, кое редовно објавува податоци за семејното насилство, нагласува дека е важно да се заштити идентитетот на жртвите. Според нивната статистика, најголем број жртви на родово базирано насилство се жени, а најчести сторители се мажи.
„Медиумите мора да известуваат со почитување на приватноста и да ги користат информациите внимателно за да избегнат дополнително трауматизирање на жртвите“, велат од МВР.
Со учество во глобалната кампања „16 дена активизам против родово базираното насилство“, медиумите имаат можност да го покажат својот ангажман за елиминација на насилството врз жените.
Известувањето кое го почитува контекстот, етичките стандарди и важноста на родовата еднаквост не само што придонесува за зголемена свест, туку и помага во изградба на општество ослободено од насилство.
ИЗВОР: racin.mk
