Здружението на хотели од Скопје, обезбедија бесплатно сместување за семејствата и роднините на повредените и почиантите лица во пожарот во дискотеката „Пулс“ во Кочани.
Во клиниките низ државава, се лекуваат 155 лица, а семејствата на повредените се пред болниците каде чекаат нови информации за нивните најблиски.
„Семејствата и блиските на настраданите и повредените лица можат бесплатно да се сместат и да одморат во хотелите на територија на градот Скопје. Доколку им се потребни повеќе информации можат да се јават на телефонскиот број 073 821 120”, објавија од Здружението на хотели во Скопје.
Претходно министерството за образование и наука соопшти дека ги отвора студентските и ученичките домови за оние кои им треба сместување во Скопје. Може да се сместат востудентскиот дом „Гоце Делчев“ во Општина Карпош, студентскиот дом „Томе Стефановски – Сениќ“ во Гази Баба, ученичкиот дом во рамки на државното училиште за образование и рехабилитација „Партенија Зографски“ исто така во Гази Баба, студентскиот дом „Пелагонија“ и на ученичкиот дом во рамки на државното училиште за образование и рехабилитација „Димитар Влахов“, двата во Кисела Вода.
Министерот за култура Зоран Љутков изјави дека сите институции од областа на културата во Скопје ги отворија вратите и се ставени на располагање за поддршка на семејствата и на сите оние на кои тоа им е потребно.
Исто така и Македонскиот народен театар понуди сместување за роднините и пријателите на починатите во трагедијата во Кочани.
ИЗВОР: ТВ 21
