Хорот на Ансамблот за народни песни и ора „Танец“ утре за првпат ќе изведе концерт со словенско-византиско пеење, на настап во во Музејот на македонската борба во 20 часот.
Станува збор за концерт кој е дел од фестивалот „Денови на македонска музика 2023“ на Сојузот на композиторите на Македонија – СОКОМ. На концертот ќе бидат промовирани и книгите „Литургии арманеска“ од Јане Коџабашија и „Краток воскресник“ од Јанаки Стојменович во транскрипција на европска нотација на д-р Мирјана Павловска-Шулајковска. Промотор е м-р Бранка Костиќ-Марковиќ
За концертот, за кој влезот е слободен, од „Танец“ велат ќе ја отслика тесната врска меѓу фолклорната и црковната македонска вокална практика. Всушност, велат оттаму, македонската јавност ќе може одблизу да се запознае со македонскиот идиом на црковното пеење.
„Истражувањата од областа на црковното пеење од словенско-византиската традиција во Македонија, кои го опфаќаат периодот од втората половина на деветнаесетиот и почетокот на дваесетиот век го потврдуваат неговиот значаен дел од македонското и општото културно наследство. Овој процес започнат на прагот на 70-тите години од минатиот век, остварува развојна истражувачка линија која се занимава со овој сегмент од македонската музичка историја. Првичните резултати од овие истражувања придонесоа црковното пеење од византиската традиција да стане мошне важно поглавје од историјата на македонската музичка култура, со што се отвори значајно поглавје во националната музика. Досега откриените ракописни и печатени псалтикии и дејноста на црковно – музичките дејци од посочениот период, представуваат континуитет на Св. Климентовото предание и го потврдуваат постоењето и практикувањето на источното црковно пеење во Македонија“, велат од „Танец“.
Денес од овој период зачувани се десетици ракописи, како и печатени зборници на црковни напеви со композиции од познати византиски композитори, но, и оригинални творби од македонски автори, црковно- музички дејци и нивните откриени ракописни или печатени псалтикии на територијата на Македонија.
Во поново време, дел од нив се претставени како печатени изданија, меѓу кои и композициите кои ќе бидат изведени на овој концерт, а се дел и од „Антологијата на македонското црковно пеење“ од проф. д-р Јане Коџабашија.
Б. НЕСТОРОСКА
ИЗВОР: sdk.mk
