Смртта на лидерот на Хамас, Јахја Синвар, не ги запре израелските напади врз Газа и Либан. И денеска, авијацијата продолжи со ракетирањето на енклавата. Преку 90 лица, меѓу кои жени и деца, загинаа во најновиот напад врз градот Беит Лахија во северниот дел на појасот.
Од Палестинското министерство за здравство тврда дека десетици други се повредени, а многумина се уште се заробени под урнатините. Од почетокот на израелската воена офанзива на 7 октомври минатата година, убиени се 42 илјади лица а речиси 100 илјади се повредени.
„Се чуствуваме мртво. Дури и сега кога бегаме, се чуствуваме како тела без душа. Бомбардирањето беше немилосрдно иако во куќите има само жени и деца. Телата останаа на улица и сега се храна за кучињата.“ – жителки на Газа.
„Бомбите паѓаа секоја минута. Експлозија по експлозија. Не покажаа никаква милост. Ова беше една од најтешките ноќи кои ги имаме доживеано. Ужасот не може да се опише.“ – жителки на Газа.
Бенјамин Нетанјаху пак ги обвини сојузниците на Иран дека се обиделе да го убијат откако дрон ја погоди неговата приватна резиденција во градот Цезарија, во централниот дел на Израел.
„Иранските агенти кои се обидоа да ме убијат мене и мојата сопруга, направија грешка за која ќе зажалат. Им кажувам на Иранците и нивните партнери од оската на злото дека секој што ќе им наштети на граѓаните на државата Израел, за тоа ќе плати висока цена.“ – Бенјамин Нетанјаху премиер на Израел.
Израелските борбени авиони продолжуваат со нападите и врз Либан. На удар повторно се најдоа позиции за кои тврдат дека ги користат борци на Хезболах. Од армијата велат дека во нападот врз седиштето на разузнавачката служба на Хезболах во Либан и подземна работилница за оружје во Бејрут, убиени биле неколку команданти на Либанската организација. Либанците пак порачуваат дека најголемата цена ја плаќаат цивилите кои немаат никаква врска со Хезболах.
„Можевме да го слушнеме дронот како лета. Јас бев на неколку минути од местото на експлозијата. Кога дојдов тука видов две лица, маж и жена. Беа мртви. Делови од нивните тела беа насекаде.“ – Шарбел Накул жител на Бејрут.
А според дел од арапските медиуми, Заменикот на генералниот секретар на Хезболах, Наим Касем побегна од Либан со ирански авион и сега живее во Техеран. Бегството на Касем во Иран го наредиле највисоките лидери на Исламската Република поради стравот дека тој може да биде следен на листата за елиминација на на Израел.
Извор: 24vesti.mk
