ХАГ (АА) – Главниот обвинител на холандскиот Врховен суд побара одобрување на одлуката на Апелациониот суд за стопирање на извозот на делови за борбените авиони Ф-35 во Израел, се вели во официјалното соопштение објавено денес, јавува Анадолу.
Врховниот суд на Холандија истакна дека одлуката на Апелациониот суд на 12 февруари, со која беше запрен извозот на делови за Ф-35 поради загриженоста дека Израел ги користи за прекршување на меѓународното право, сега мора да биде одобрена.
Цитирајќи меѓународни договори во кои Холандија е една од страните, државниот обвинител Пол Влас тврди дека извозот на воени материјали треба да се забрани доколку постои јасен ризик од нивна злоупотреба. Одлуката на Врховниот суд се очекува наскоро.
Групите за човекови права, меѓу кои и Оксфам Новиб, ПАКС и Форумот за права, поднесоа тужба против холандската Влада, барајќи од неа да го запре извозот на делови за Ф-35 во Израел.
На 15 декември, холандскиот суд го одби нивното барање со образложение дека владата не е обврзана да ја запре продажбата. Невладините организации поднесоа жалба, и на 22 јануари Апелациониот суд ја укина првичната одлука.
На 12 февруари, Апелациониот суд ѝ наложи на владата да го блокира целиот извоз на делови за авионите Ф-35 во Израел поради стравувањата дека тие се користени за кршење на меѓународното право во Газа.
Во октомври 2023 година, Израел започна брутална офанзива во Газа, во којашто досега се убиени речиси 44.300 луѓе, повеќето жени и деца, а повредени се речиси 105.000.
Минатата недела, Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант, поради воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите дејства во Газа.
Извор: Anadolu Agency (AA)
